chand chhune ki talabgar nahin ho sakti

chāñd chhūne kī talabgār nahīñ ho saktī

kyā mirī ḳhaak chamakdār nahīñ ho saktī

ho na ho apnī basārat ne mujhe rokā hai

ġhaib jaate hue dīvār nahīñ ho saktī

jitnī peḌoñ meñ nazar aatī hai taqlīb ke ba.ad

ye zamīñ itnī pur-asrār nahīñ ho saktī

maiñ ne DhūñDā hai charāġhoñ kī lavoñ meñ tujh ko

tū sitāre meñ numūdār nahīñ ho saktī

ye zamīnoñ pe lahaktī huī gandum kī mahak

āsmānoñ kī taraf-dār nahīñ ho saktī

maiñ kise ḳhvāb sunāne ke liye aayā huuñ

shab agar niiñd se bedār nahīñ ho saktī

jis ne aañsū pe qanā.at kā chalan sīkhā ho

vo nazar ḳhūgar-e-dīnār nahīñ ho saktī

chand chhune ki talabgar nahin ho sakti

kya meri KHak chamakdar nahin ho sakti

ho na ho apni basarat ne mujhe roka hai

ghaib jate hue diwar nahin ho sakti

jitni peDon mein nazar aati hai taqlib ke baad

ye zamin itni pur-asrar nahin ho sakti

main ne DhunDa hai charaghon ki lawon mein tujh ko

tu sitare mein numudar nahin ho sakti

ye zaminon pe lahakti hui gandum ki mahak

aasmanon ki taraf-dar nahin ho sakti

main kise KHwab sunane ke liye aaya hun

shab agar nind se bedar nahin ho sakti

jis ne aansu pe qanaat ka chalan sikha ho

wo nazar KHugar-e-dinar nahin ho sakti