chand ka raqs sitaron ka fusun mangti hai

chāñd kā raqs sitāroñ kā fusūñ māñgtī hai

zindagī phir koī andāz-e-junūñ māñgtī hai

muddateñ guzrīñ ki yaḳh-basta hue qalb-o-jigar

ġhairat-e-ishq magar soz-e-darūñ māñgtī hai

faiz-e-mausam thā parinde hue āzād magar

ḳhū-e-sayyād vahī said-e-zabūñ māñgtī hai

fasl-e-gul ke liye kyā jaan pe khele koī

ab to har mauj-e-havā tohfa-e-ḳhūñ māñgtī hai

kuchh to ai yūrish-e-ālām-o-havādis dam le

gardish-e-vaqt bhī thoḌā sā sakūñ māñgtī hai

ḳhūbī-e-fan nahīñ parvarda-e-āvurd 'sahar'

rūh-e-taḳhlīq dam-e-kun-fa-yakūñ māñgtī hai

chand ka raqs sitaron ka fusun mangti hai

zindagi phir koi andaz-e-junun mangti hai

muddaten guzrin ki yaKH-basta hue qalb-o-jigar

ghairat-e-ishq magar soz-e-darun mangti hai

faiz-e-mausam tha parinde hue aazad magar

KHu-e-sayyaad wahi said-e-zabun mangti hai

fasl-e-gul ke liye kya jaan pe khele koi

ab to har mauj-e-hawa tohfa-e-KHun mangti hai

kuchh to ai yurish-e-alam-o-hawadis dam le

gardish-e-waqt bhi thoDa sa sakun mangti hai

KHubi-e-fan nahin parwarda-e-awurd 'sahar'

ruh-e-taKHliq dam-e-kun-fa-yakun mangti hai