chand ke des mein hai ji ka ziyan saudagar

chāñd ke des meñ hai jī kā ziyāñ saudāgar

mol kyā doge ġham-e-dil kā vahāñ saudāgar

ab vo agle se yahāñ misr ke bāzār nahīñ

aa ga.e shahr-e-tamannā meñ kahāñ saudāgar

dil kā har zaḳhm hai ā.īna tirī sūrat kā

tū ne dekhī nahīñ shīshoñ kī dukāñ saudāgar

har galī chup hai ki aaseb kā saaya jaise

shahr-e-dil se tirī ruḳhsat kā samāñ saudāgar

sahl itnā to nahīñ rūp-nagar se jaanā

duur tak jā.egā aahoñ kā dhuāñ saudāgar

naqd-e-jāñ aa.e haiñ bāzār meñ le kar jab se

ho ga.ī jins-e-vafā aur girāñ saudāgar

dil ke vīrān darīchoñ pe charāġhāñ 'māhir'

kaun detā hai sar-e-shām azaañ saudāgar

chand ke des mein hai ji ka ziyan saudagar

mol kya doge gham-e-dil ka wahan saudagar

ab wo agle se yahan misr ke bazar nahin

aa gae shahr-e-tamanna mein kahan saudagar

dil ka har zaKHm hai aaina teri surat ka

tu ne dekhi nahin shishon ki dukan saudagar

har gali chup hai ki aaseb ka saya jaise

shahr-e-dil se teri ruKHsat ka saman saudagar

sahl itna to nahin rup-nagar se jaana

dur tak jaega aahon ka dhuan saudagar

naqd-e-jaan aae hain bazar mein le kar jab se

ho gai jins-e-wafa aur giran saudagar

dil ke viran darichon pe charaghan 'mahir'

kaun deta hai sar-e-sham azan saudagar