chand kohre ke jaziron mein bhaTakta hoga

chāñd kohre ke jazīroñ meñ bhaTaktā hogā

raqs-gāh meñ tū ne malbūs utārā hogā

yak-ba-yak chīḳh uThe chaar dishāoñ kā sukūt

zard din meñ kabhī aisā ho to phir kyā hogā

the vo darmāñda-e-shab jaag ke phir sote the

shahr-e-zulmāt hai kab is meñ saverā hogā

aañkh ke kaale gaḌhoñ meñ vo giraftār the sab

kis ne girte ho.uuñ ko haath se thāmā hogā

sañg-o-āhan kī fasīloñ pe sharāre lapke

ḳhuun alfāz kī rag rag ne uchhālā hogā

le ga.ī bahtī havā duur bahut duur mujhe

tū ne ghar ghar mujhe bekār talāshā hogā

ka.ī dīvāreñ huī haiñ pas-e-dīvār khaḌī

phir koī soḳhta-dil raat ko chīḳhā hogā

mauj-dar-mauj hai an-dekhe jazīroñ kā fusūñ

tū ne shab bhar mujhe sāhil pe pukārā hogā

shahr kī saḌkoñ pe ye ghūmte kaale jañgal

gher leñ mujh ko ye har samt se phir kyā hogā

bahr to bahr hai rū-posh hue dasht-o-jabal

kyā ḳhabar thī ye mere jism kā saayā hogā

tum bhalā mujh se ḳhafā ho ke kahāñ jāogī

shahr kī galiyoñ meñ is vaqt añdherā hogā

chand kohre ke jaziron mein bhaTakta hoga

raqs-gah mein tu ne malbus utara hoga

yak-ba-yak chiKH uThe chaar dishaon ka sukut

zard din mein kabhi aisa ho to phir kya hoga

the wo darmanda-e-shab jag ke phir sote the

shahr-e-zulmat hai kab is mein sawera hoga

aankh ke kale gaDhon mein wo giraftar the sab

kis ne girte houn ko hath se thama hoga

sang-o-ahan ki fasilon pe sharare lapke

KHun alfaz ki rag rag ne uchhaala hoga

le gai bahti hawa dur bahut dur mujhe

tu ne ghar ghar mujhe bekar talasha hoga

kai diwaren hui hain pas-e-diwar khaDi

phir koi soKHta-dil raat ko chiKHa hoga

mauj-dar-mauj hai an-dekhe jaziron ka fusun

tu ne shab bhar mujhe sahil pe pukara hoga

shahr ki saDkon pe ye ghumte kale jangal

gher len mujh ko ye har samt se phir kya hoga

bahr to bahr hai ru-posh hue dasht-o-jabal

kya KHabar thi ye mere jism ka saya hoga

tum bhala mujh se KHafa ho ke kahan jaogi

shahr ki galiyon mein is waqt andhera hoga