chand par hai mujhe tera hi guman aaj ki raat

chāñd par hai mujhe terā hī gumāñ aaj kī raat

sūjhtā hī nahīñ kuchh sūd-o-ziyāñ aaj kī raat

dard-e-insān meñ insān miTā jaatā hai

ik na.e ahd kā miltā hai nishāñ aaj kī raat

jāma-e-hastī-e-insāñ hai ba-rañg-e-mātam

uTh rahā hai sham-e-sozāñ se dhuāñ aaj kī raat

ik na.e moḌ pe hai dard-e-mohabbat apnā

dārū-e-dard hai ḳhud dard-e-jahāñ aaj kī raat

ai sitāroñ ke ḳhudāvand ye kyā aalam hai

chāñdnī meñ bhī hai tārīk jahāñ aaj kī raat

kyā hai me.arāj yahī dard kī lazzat apnī

kyā isī meñ haiñ rumūz-e-do-jahāñ aaj kī raat

duur se aatī haiñ kānoñ meñ diloñ kī aaheñ

kyā inhīñ meñ hai ḳhudā-vand-e-jahāñ aaj kī raat

jo bhī mazlūm hai dil us ke liye rotā hai

merī har saañs meñ hai shor-e-fuġhāñ aaj kī raat

chand par hai mujhe tera hi guman aaj ki raat

sujhta hi nahin kuchh sud-o-ziyan aaj ki raat

dard-e-insan mein insan miTa jata hai

ek nae ahd ka milta hai nishan aaj ki raat

jama-e-hasti-e-insan hai ba-rang-e-matam

uTh raha hai sham-e-sozan se dhuan aaj ki raat

ek nae moD pe hai dard-e-mohabbat apna

daru-e-dard hai KHud dard-e-jahan aaj ki raat

ai sitaron ke KHudawand ye kya aalam hai

chandni mein bhi hai tarik jahan aaj ki raat

kya hai mearaj yahi dard ki lazzat apni

kya isi mein hain rumuz-e-do-jahan aaj ki raat

dur se aati hain kanon mein dilon ki aahen

kya inhin mein hai KHuda-wand-e-jahan aaj ki raat

jo bhi mazlum hai dil us ke liye rota hai

meri har sans mein hai shor-e-fughan aaj ki raat