chand sitare muTThi mein the suraj se yarana tha

chāñd sitāre muTThī meñ the sūraj se yārāna thā

kyā din the jab ḳhvāb-nagar meñ apnā aanā jaanā thā

ik jaadū sā jaise merī har dhaḌkan meñ utrā thā

mujh ko ḳhud mā'lūm nahīñ maiñ kyoñ itnā dīvāna thā

sab mujh ko saudā.ī kah kar tujh ko rusvā karte the

nazreñ merī or thiiñ lekin terī or nishāna thā

jaane kaisā shaḳhs thā bāteñ dīvānoñ sī kartā thā

ḳhvābīda āñkheñ thiiñ lab par pariyoñ kā afsāna thā

ek kahānī jis meñ shāyad sab kuchh tai thā pahle se

ek fasāna jis meñ sab kuchh mil kar bhī kho jaanā thā

tujhe mukammal karnā thā ik hissa mere qisse kā

mujh ko tere afsāne meñ ik kirdār nibhānā thā

bhiiḌ se bāhar aa kar dekhā thā duniyā ke mele ko

saarī chahal-pahal ke pīchhe jāñ-levā vīrāna thā

āḳhir thak kar chhoḌ diyā hastī kī uljhī ġhutthī ko

suljhāne kī koshish karnā aur use uljhānā thā

chand sitare muTThi mein the suraj se yarana tha

kya din the jab KHwab-nagar mein apna aana jaana tha

ek jadu sa jaise meri har dhaDkan mein utra tha

mujh ko KHud ma'lum nahin main kyon itna diwana tha

sab mujh ko saudai kah kar tujh ko ruswa karte the

nazren meri or thin lekin teri or nishana tha

jaane kaisa shaKHs tha baaten diwanon si karta tha

KHwabida aankhen thin lab par pariyon ka afsana tha

ek kahani jis mein shayad sab kuchh tai tha pahle se

ek fasana jis mein sab kuchh mil kar bhi kho jaana tha

tujhe mukammal karna tha ek hissa mere qisse ka

mujh ko tere afsane mein ek kirdar nibhana tha

bhiD se bahar aa kar dekha tha duniya ke mele ko

sari chahal-pahal ke pichhe jaan-lewa virana tha

aaKHir thak kar chhoD diya hasti ki uljhi ghutthi ko

suljhane ki koshish karna aur use uljhana tha