chandni-raat mein sandal sa bikharta saya

chāñdnī-rāt meñ sandal sā bikhartā saaya

ek aaseb kī sūrat nazar aayā saaya

sar pe sūraj hai magar hashr kā maidān nahīñ

jaane kyuuñ raah meñ qadmoñ se hai uljhā saaya

fard kī zaat meñ nādīda nazāre kī tarah

saa.e ke saath Tahaltā nazar aayā saaya

ye bhī vāraftagī-e-shauq meñ hotā hai gumāñ

abhī aayā hai mire paas mahaktā saaya

ye vahī log haiñ jo din meñ the mere jaise

shaam ke vaqt nazar aate haiñ saaya saaya

munjamid raushnī phūTī thī kisī chādar se

maiñ ne kal abr se chhantā huā dekhā saaya

kal tak is sāya-e-dīvār meñ dam miltā thā

zindagī lagtī hai ab ek khañDar kā saaya

chandni-raat mein sandal sa bikharta saya

ek aaseb ki surat nazar aaya saya

sar pe suraj hai magar hashr ka maidan nahin

jaane kyun rah mein qadmon se hai uljha saya

fard ki zat mein nadida nazare ki tarah

sae ke sath Tahalta nazar aaya saya

ye bhi waraftagi-e-shauq mein hota hai guman

abhi aaya hai mere pas mahakta saya

ye wahi log hain jo din mein the mere jaise

sham ke waqt nazar aate hain saya saya

munjamid raushni phuTi thi kisi chadar se

main ne kal abr se chhanta hua dekha saya

kal tak is saya-e-diwar mein dam milta tha

zindagi lagti hai ab ek khanDar ka saya