chaar-din ko hai yahan shart-e-iqamat kya kya

chār-din ko hai yahāñ shart-e-iqāmat kyā kyā

fursat-e-zīst meñ shāmil hai musībat kyā kyā

sar-phire log haiñ ham apne junūñ kī rau meñ

soch lete haiñ dil-e-zār kī qīmat kyā kyā

vo to kahiye ki guzar kar ḳhas-o-ḳhāshāk hue

varna sañgīn thī hālāt kī sūrat kyā kyā

aaj mushkil hai bahut vāda-e-fardā pe yaqīñ

aur kal dosh pe aa.egī nadāmat kyā kyā

tum to kyā ho sar-e-dīvār-e-zamāna 'ḳhurshīd'

rā.egāñ ho ke miTā naqsh-e-fazīlat kyā kyā

chaar-din ko hai yahan shart-e-iqamat kya kya

fursat-e-zist mein shamil hai musibat kya kya

sar-phire log hain hum apne junun ki rau mein

soch lete hain dil-e-zar ki qimat kya kya

wo to kahiye ki guzar kar KHas-o-KHashak hue

warna sangin thi haalat ki surat kya kya

aaj mushkil hai bahut wada-e-farda pe yaqin

aur kal dosh pe aaegi nadamat kya kya

tum to kya ho sar-e-diwar-e-zamana 'KHurshid'

raegan ho ke miTa naqsh-e-fazilat kya kya