chaDha hua hai jo suraj wo Dhal bhi sakta hai

chaḌhā huā hai jo sūraj vo Dhal bhī saktā hai

havā-e-vaqt kā ruḳh to badal bhī saktā hai

ḳhamosh lab hai jo dariyā to ḳhair hai sab kī

bigaḌ gayā to vo bastī nigal bhī saktā hai

chalo ai tishna-labo ham uThā.eñ dast-e-duā

ki āsmān duā se pighal bhī saktā hai

manāo jashn mukammal bahār aane par

abhī nayā sā hai mausam badal bhī saktā hai

vo phuul jaisā badan chāñdnī se hai Dartā

ki chāñdnī meñ badan us kā jal bhī saktā hai

tumheñ to shauq hai phūloñ ke saath rahne kā

hamārā azm jo kāñToñ pe chal bhī saktā hai

hai āsmāñ kī bulandī meñ ghar 'zafar' jis kā

zamīñ kī had se vo bāhar nikal bhī saktā hai

chaDha hua hai jo suraj wo Dhal bhi sakta hai

hawa-e-waqt ka ruKH to badal bhi sakta hai

KHamosh lab hai jo dariya to KHair hai sab ki

bigaD gaya to wo basti nigal bhi sakta hai

chalo ai tishna-labo hum uThaen dast-e-dua

ki aasman dua se pighal bhi sakta hai

manao jashn mukammal bahaar aane par

abhi naya sa hai mausam badal bhi sakta hai

wo phul jaisa badan chandni se hai Darta

ki chandni mein badan us ka jal bhi sakta hai

tumhein to shauq hai phulon ke sath rahne ka

hamara azm jo kanTon pe chal bhi sakta hai

hai aasman ki bulandi mein ghar 'zafar' jis ka

zamin ki had se wo bahar nikal bhi sakta hai