chain aata nahin un se mulaqat kiye bin

chain aatā nahīñ un se mulāqāt kiye bin

boleñ na vo maiñ rahtī nahīñ baat kiye bin

kambaḳht havāoñ ne ye kyā keh diyā un se

kyoñ abr uḌe jaate haiñ barsāt kiye bin

mai aa ga.ī ghar meñ ye ḳhabar shaiḳh na sun leñ

lauT ā.eñge masjid se munājāt kiye bin

shāyad unheñ Dar ho maiñ shikāyāt karūñgī

aa.e the ga.e pursish-e-hālāt kiye bin

tum un se koī baat ishāroñ meñ na karnā

kam-fahm na māneñge savālāt kiye bin

sultān ko apnā koī shahkār na kar pesh

chhoḌegā na vo tujh ko qalam haath kiye bin

kyā vaz.a banāte haiñ siyāsat ke mashā.iḳh

aabid nazar aate haiñ ibādāt kiye bin

chain aata nahin un se mulaqat kiye bin

bolen na wo main rahti nahin baat kiye bin

kambaKHt hawaon ne ye kya keh diya un se

kyon abr uDe jate hain barsat kiye bin

mai aa gai ghar mein ye KHabar shaiKH na sun len

lauT aaenge masjid se munajat kiye bin

shayad unhen Dar ho main shikayat karungi

aae the gae pursish-e-haalat kiye bin

tum un se koi baat ishaaron mein na karna

kam-fahm na manenge sawalat kiye bin

sultan ko apna koi shahkar na kar pesh

chhoDega na wo tujh ko qalam hath kiye bin

kya waza banate hain siyasat ke mashaiKH

aabid nazar aate hain ibaadat kiye bin