chain ghar mein na kabhi tere nagar mein paun

chain ghar meñ na kabhī tere nagar meñ pā.ūñ

ḳhud ko har lamha maiñ ik lambe safar meñ pā.ūñ

koī āvāz na saaya na havā meñ halchal

mo'tariz soch meñ kyā baiTh ke ghar meñ pā.ūñ

tū kabhī phuul kabhī chāñdnī thā mere liye

ab tujhe pairhan-e-barq-o-sharar meñ pā.ūñ

maiñ kahīñ jism kahīñ aur mirī ruuh kahīñ

ḳhud ko bikhrā huā har rāhguzar meñ pā.ūñ

mujh se har lamha koī jurm nayā hotā hai

ik na ik hādisa har taaza ḳhabar meñ pā.ūñ

maiñ gavāhī pe to tayyār huuñ ḳhud apne ḳhilāf

vaq.at-e-adl jo munsif kī nazar meñ pā.ūñ

chain ghar mein na kabhi tere nagar mein paun

KHud ko har lamha main ek lambe safar mein paun

koi aawaz na saya na hawa mein halchal

mo'tariz soch mein kya baiTh ke ghar mein paun

tu kabhi phul kabhi chandni tha mere liye

ab tujhe pairhan-e-barq-o-sharar mein paun

main kahin jism kahin aur meri ruh kahin

KHud ko bikhra hua har rahguzar mein paun

mujh se har lamha koi jurm naya hota hai

ek na ek hadisa har taza KHabar mein paun

main gawahi pe to tayyar hun KHud apne KHilaf

waqat-e-adl jo munsif ki nazar mein paun