chain kab aata hai ghar mein tere diwane ko

chain kab aatā hai ghar meñ tire dīvāne ko

phir liye jaatī hai vahshat mujhe vīrāne ko

tum miTāte ho jo mujh ko to samajh lo ye bhī

sham' rotī hai bahut maar ke parvāne ko

hai agar aish kisī ko to balā se apnī

ham to paidā hue haiñ ranj-o-alam khāne ko

ḳhud bhī suulī pe chaḌhā yaar ko rusvā bhī kiyā

kyā kahe ab koī mansūr se dīvāne ko

bū haqīqat kī na ho to gul-e-mazmūñ kyā hai

phuul kāġhaz kā hai ik dekhne dikhlāne ko

naam ko bhī na kisī aañkh se aañsū niklā

sham' mahfil meñ jalātī rahī parvāne ko

koī hamdard nahīñ apnā zamāne meñ 'zafar'

aazmā dekhā hai har apne ko begāne ko

chain kab aata hai ghar mein tere diwane ko

phir liye jati hai wahshat mujhe virane ko

tum miTate ho jo mujh ko to samajh lo ye bhi

sham' roti hai bahut mar ke parwane ko

hai agar aish kisi ko to bala se apni

hum to paida hue hain ranj-o-alam khane ko

KHud bhi suli pe chaDha yar ko ruswa bhi kiya

kya kahe ab koi mansur se diwane ko

bu haqiqat ki na ho to gul-e-mazmun kya hai

phul kaghaz ka hai ek dekhne dikhlane ko

nam ko bhi na kisi aankh se aansu nikla

sham' mahfil mein jalati rahi parwane ko

koi hamdard nahin apna zamane mein 'zafar'

aazma dekha hai har apne ko begane ko