chain paDta hai dil ko aaj na kal

chain paḌtā hai dil ko aaj na kal

vahī uljhan ghaḌī ghaḌī pal pal

merā jiinā hai sej kāñToñ kī

un ke marne kā naam tāj-mahal

kyā suhānī ghaTā hai sāvan kī

sāñvarī naar madh-bharī chanchal

na huā raf.a mere dil kā ġhubār

kaise kaise baras ga.e bādal

pyaar kī rāgnī anokhī hai

us meñ lagtī haiñ sab sureñ komal

bin piye añkhḌiyāñ nashīlī haiñ

nain kaale haiñ tere bin kājal

mujhe dhokā huā ki jaadū hai

paañv bajte haiñ tere bin chhāgal

laakh āñdhī chale ḳhayābāñ meñ

muskurāte haiñ tāqchoñ meñ kañval

laakh bijlī gire gulistāñ meñ

lahlahātī hai shāḳh meñ koñpal

khil rahā hai gulāb Daalī par

jal rahī hai bahār kī mash.al

kohkan se mafar nahīñ koī

be-sutūñ ho kahīñ ki bindhiyāchal

ek din pattharoñ ke bojh tale

ḳhud-baḳhud gir paḌeñge rāj-mahal

dam-e-ruḳhsat vo chup rahe 'ābid'

aañkh meñ phailtā gayā kājal

chain paDta hai dil ko aaj na kal

wahi uljhan ghaDi ghaDi pal pal

mera jina hai sej kanTon ki

un ke marne ka nam taj-mahal

kya suhani ghaTa hai sawan ki

sanwari nar madh-bhari chanchal

na hua rafa mere dil ka ghubar

kaise kaise baras gae baadal

pyar ki ragni anokhi hai

us mein lagti hain sab suren komal

bin piye ankhDiyan nashili hain

nain kale hain tere bin kajal

mujhe dhoka hua ki jadu hai

panw bajte hain tere bin chhagal

lakh aandhi chale KHayaban mein

muskuraate hain taqchon mein kanwal

lakh bijli gire gulistan mein

lahlahati hai shaKH mein konpal

khil raha hai gulab Dali par

jal rahi hai bahaar ki mashal

kohkan se mafar nahin koi

be-sutun ho kahin ki bindhiyachal

ek din pattharon ke bojh tale

KHud-baKHud gir paDenge raj-mahal

dam-e-ruKHsat wo chup rahe 'abid'

aankh mein phailta gaya kajal