chain wo ishq mein pae hain ki ji jaanta hai

chain vo ishq meñ paa.e haiñ ki jī jāntā hai

dard dukh bhī vo uThā.e haiñ ki jī jāntā hai

yaad aatī haiñ javānī kī bahāreñ ab tak

vo maze ham ne uḌaa.e haiñ ki jī jāntā hai

haañ duā bhī kabhī lī hogī kisī ke dil kī

tum ne dil bhī vo dukhā.e haiñ ki jī jāntā hai

vo lajāte hue sharmāte hue bazm meñ aaj

is tarah sāmne aa.e haiñ ki jī jāntā hai

haañ kaleje bhī kiye hoñge kisī ke ThanDe

tum ne jī bhī vo jalā.e haiñ ki jī jāntā hai

chhiḌ ga.ī bahs khulī un pe jo dil kī chorī

is tarah aañkh churā.e haiñ ki jī jāntā hai

ġhair to ġhair hī haiñ ishq meñ dekhā sab ko

apne bhī aise parā.e haiñ ki jī jāntā hai

aap ke pyaar se aġhyār ne kyā kyā na kiyā

vo vo tūfān uThā.e haiñ ki jī jāntā hai

rakh ke aġhyār pe mahfil meñ vo taan o tashnī.a

is tarah mujh ko sunā.e haiñ ki jī jāntā hai

'lutf' ham us but-e-saffāk ke kūche se aaj

bach kar is tarah se aa.e haiñ ki jī jāntā hai

chain wo ishq mein pae hain ki ji jaanta hai

dard dukh bhi wo uThae hain ki ji jaanta hai

yaad aati hain jawani ki bahaaren ab tak

wo maze hum ne uDae hain ki ji jaanta hai

han dua bhi kabhi li hogi kisi ke dil ki

tum ne dil bhi wo dukhae hain ki ji jaanta hai

wo lajate hue sharmate hue bazm mein aaj

is tarah samne aae hain ki ji jaanta hai

han kaleje bhi kiye honge kisi ke ThanDe

tum ne ji bhi wo jalae hain ki ji jaanta hai

chhiD gai bahs khuli un pe jo dil ki chori

is tarah aankh churae hain ki ji jaanta hai

ghair to ghair hi hain ishq mein dekha sab ko

apne bhi aise parae hain ki ji jaanta hai

aap ke pyar se aghyar ne kya kya na kiya

wo wo tufan uThae hain ki ji jaanta hai

rakh ke aghyar pe mahfil mein wo tan o tashnia

is tarah mujh ko sunae hain ki ji jaanta hai

'lutf' hum us but-e-saffak ke kuche se aaj

bach kar is tarah se aae hain ki ji jaanta hai