chala tha aasman chhune uDan se bhi gaya

chalā thā āsmāñ chhūne uḌaan se bhī gayā

parā.e meñ na rahā ḳhāndān se bhī gayā

yaqīn TuuTā to apnoñ pe e'tibār kiyā

mire ḳhayāl se vahm-o-gumān se bhī gayā

parā.e logoñ se is darja unsiyat rakkhī

ki apne logoñ ke yaksar dhiyān se bhī gayā

zarūratoñ ko ta.alluq pe fauqiyat kyā dī

ḳhudī bhī jaatī rahī mehrbān se bhī gayā

guzarte lamhoñ ko muTThī meñ qaid kar na sakā

gañvāyā vaqt bhī apne plan se bhī gayā

use ye zo.am ke sar hoñge ma.arke saare

magar ye ho na sakā apnī jaan se bhī gayā

chala tha aasman chhune uDan se bhi gaya

parae mein na raha KHandan se bhi gaya

yaqin TuTa to apnon pe e'tibar kiya

mere KHayal se wahm-o-guman se bhi gaya

parae logon se is darja unsiyat rakkhi

ki apne logon ke yaksar dhiyan se bhi gaya

zaruraton ko talluq pe fauqiyat kya di

KHudi bhi jati rahi mehrban se bhi gaya

guzarte lamhon ko muTThi mein qaid kar na saka

ganwaya waqt bhi apne plan se bhi gaya

use ye zoam ke sar honge marke sare

magar ye ho na saka apni jaan se bhi gaya