chale hain sath hum anjaan ho kar

chale haiñ saath ham anjān ho kar

rahe apne hī ghar mehmān ho kar

milī thī rāste meñ zindagī bhī

mujhe taktī rahī hairān ho kar

mujhe samjhā nahīñ shāyad kisī ne

bahut mushkil meñ huuñ āsān ho kar

jahāñ hai vo vahāñ par ham nahīñ haiñ

paḌe haiñ ghar meñ ham sāmān ho kar

koī dhaḌkā nahīñ luTne kā mujh ko

maiñ ḳhush huuñ be-sar-o-sāmān ho kar

mohabbat jañg thī mahñgī paḌī hai

huī taqsīm maiñ tāvān ho kar

bahut mānūs thī maiñ jugnuoñ se

unheñ taktī huuñ ab hairān ho kar

mirī pahchān mujh se chhin ga.ī hai

judā hai vo mirī pahchān ho kar

maiñ sāñsoñ ke bharose pe khaḌī thī

mujhe jiinā thā us kī jaan ho kar

'farah' maiñ apnī puurī dāstāñ thī

magar ab rah ga.ī unvān ho kar

chale hain sath hum anjaan ho kar

rahe apne hi ghar mehman ho kar

mili thi raste mein zindagi bhi

mujhe takti rahi hairan ho kar

mujhe samjha nahin shayad kisi ne

bahut mushkil mein hun aasan ho kar

jahan hai wo wahan par hum nahin hain

paDe hain ghar mein hum saman ho kar

koi dhaDka nahin luTne ka mujh ko

main KHush hun be-sar-o-saman ho kar

mohabbat jang thi mahngi paDi hai

hui taqsim main tawan ho kar

bahut manus thi main jugnuon se

unhen takti hun ab hairan ho kar

meri pahchan mujh se chhin gai hai

juda hai wo meri pahchan ho kar

main sanson ke bharose pe khaDi thi

mujhe jina tha us ki jaan ho kar

'farah' main apni puri dastan thi

magar ab rah gai unwan ho kar