chali KHirad ki na kuchh aagahi ne sath diya

chalī ḳhirad kī na kuchh āgahī ne saath diyā

rah-e-junūñ meñ faqat be-ḳhudī ne saath diyā

shab-e-firāq kī zulmat meñ ġham ke māroñ kā

tire ḳhayāl kī tābindagī ne saath diyā

tamām raat tarāshe hasīñ hasīñ paikar

tamām raat fan-e-āzarī ne saath diyā

agar zabāñ se bayāñ hāl-e-ġham na ho paayā

huzūr-e-dost mirī ḳhāmushī ne saath diyā

gurez aur tire dāman se vo to ḳhair huī

mire ḳhulūs kī pākīzgī ne saath diyā

ham aur aap se iz.hār-e-ārzū karte

ye kahiye shauq kī vāraftagī ne saath diyā

chali KHirad ki na kuchh aagahi ne sath diya

rah-e-junun mein faqat be-KHudi ne sath diya

shab-e-firaq ki zulmat mein gham ke maron ka

tere KHayal ki tabindagi ne sath diya

tamam raat tarashe hasin hasin paikar

tamam raat fan-e-azari ne sath diya

agar zaban se bayan haal-e-gham na ho paya

huzur-e-dost meri KHamushi ne sath diya

gurez aur tere daman se wo to KHair hui

mere KHulus ki pakizgi ne sath diya

hum aur aap se izhaar-e-arzu karte

ye kahiye shauq ki waraftagi ne sath diya