chali na jae ye jaan tan ke daere se alag

chalī na jaa.e ye jaañ tan ke dā.ere se alag

mujhe na kījiye yuuñ apne āsare se alag

jo apnī āñkhoñ meñ ḳhvāboñ ko pāltā hī nahīñ

haqīqatoñ ke jahāñ meñ hai vo sire se alag

hamāre dil meñ mohabbat muqīm hai ab bhī

qiyām-e-tāj-mahal kab thā aagre se alag

mirī nigāh meñ sikka har ek chehra hai

maiñ kar rahā huuñ abhī khoTe ko khare se alag

dil-o-dimāġh kī is kashmakash se baaz aa.e

hayāt chāhiye ham ko munāzre se alag

tarīqa aur bhī hai yaar se taḳhātub kā

ki lafz aur koī laao ai are se alag

vo ek shaḳhs jo har ghar kī baat kartā hai

use samajhtī hai duniyā mu'āshre se alag

chali na jae ye jaan tan ke daere se alag

mujhe na kijiye yun apne aasare se alag

jo apni aankhon mein KHwabon ko palta hi nahin

haqiqaton ke jahan mein hai wo sire se alag

hamare dil mein mohabbat muqim hai ab bhi

qiyam-e-taj-mahal kab tha aagre se alag

meri nigah mein sikka har ek chehra hai

main kar raha hun abhi khoTe ko khare se alag

dil-o-dimagh ki is kashmakash se baz aae

hayat chahiye hum ko munazre se alag

tariqa aur bhi hai yar se taKHatub ka

ki lafz aur koi lao ai are se alag

wo ek shaKHs jo har ghar ki baat karta hai

use samajhti hai duniya mu'ashre se alag