chalo dil ki kahani ko mukammal kar diya jae

chalo dil kī kahānī ko mukammal kar diyā jaa.e

bachī hai jo jagah ḳhālī use bhī bhar diyā jaa.e

kare ab pyaar kā iqrār yā inkār kar de vo

mohabbat ke liye iz.hār us se kar diyā jaa.e

nigāhoñ se chhalaktā hai ajab hai ishq kā qissa

chhalakne ko zarūrī hai ragoñ meñ bhar diyā jaa.e

hamārī aañkh se kahne lage haiñ ḳhvāb ro-ro kar

bhaTakte phir rahe haiñ ham hameñ bhī ghar diyā jaa.e

jidhar dekhūñ udhar hī rahzanoñ kī bhiiḌ hai maulā

safar meñ saath chalne ko mujhe rahbar diyā jaa.e

nahīñ ye sochnā is khel meñ kyā faisla hogā

lagā lī shart to ab okhlī meñ sar diyā jaa.e

chalo dil ki kahani ko mukammal kar diya jae

bachi hai jo jagah KHali use bhi bhar diya jae

kare ab pyar ka iqrar ya inkar kar de wo

mohabbat ke liye izhaar us se kar diya jae

nigahon se chhalakta hai ajab hai ishq ka qissa

chhalakne ko zaruri hai ragon mein bhar diya jae

hamari aankh se kahne lage hain KHwab ro-ro kar

bhaTakte phir rahe hain hum hamein bhi ghar diya jae

jidhar dekhun udhar hi rahzanon ki bhiD hai maula

safar mein sath chalne ko mujhe rahbar diya jae

nahin ye sochna is khel mein kya faisla hoga

laga li shart to ab okhli mein sar diya jae