chalte chalte aafiyat ka ek maqam aa hi gaya

chalte chalte 'āfiyat kā ik maqām aa hī gayā

sū-e-maqtal kārvān-e-tez-gām aa hī gayā

ho gayā ifshā-e-rāz-e-‘ishq is ko kyā karūñ

marte dam merī zabāñ par un kā naam aa hī gayā

un kā dāman bhī liyā apne garebāñ kī tarah

puḳhtagī par ab mirā saudā-e-ḳhām aa hī gayā

is adā-e-ruḳh pe bikhre un ke gesū-e-hasīñ

murġh-e-dil āḳhir taḌap kar zer-e-dām aa hī gayā

bāda-noshoñ ko milā sabr-o-tahammul kā sila

abr-e-tar chhā hī gayā gardish meñ jaam aa hī gayā

chalte chalte 'afiyat ka ek maqam aa hi gaya

su-e-maqtal karwan-e-tez-gam aa hi gaya

ho gaya ifsha-e-raaz-e-‘ishq is ko kya karun

marte dam meri zaban par un ka nam aa hi gaya

un ka daman bhi liya apne gareban ki tarah

puKHtagi par ab mera sauda-e-KHam aa hi gaya

is ada-e-ruKH pe bikhre un ke gesu-e-hasin

murgh-e-dil aaKHir taDap kar zer-e-dam aa hi gaya

baada-noshon ko mila sabr-o-tahammul ka sila

abr-e-tar chha hi gaya gardish mein jam aa hi gaya