chamakte tāroñ pe terā hī naam likhte haiñ
sunahre lafzoñ meñ tujh ko payām likhte haiñ
tire dayār pe jab ruk ga.e haiñ mere qadam
tire hī dar pe to ab ham salām likhte haiñ
sulagte sho.ale to hote hī haiñ jalāne ko
jo jal chuke haiñ vo zaḳhmī avaam likhte haiñ
ye kaise kaisoñ ko ham ne banāyā rāh-numā
halāl chiiz ko jo ab harām likhte haiñ
bahut ġharīb haiñ bhūke haiñ ehtijājan ham
bayāz-e-vaqt pe ye sub.h-o-shām likhte haiñ
unheñ ḳhabar nahīñ 'sāhir' ham aaj haiñ āzād
jo apne aap ko ab bhī ġhulām likhte haiñ
chamakte taron pe tera hi nam likhte hain
sunahre lafzon mein tujh ko payam likhte hain
tere dayar pe jab ruk gae hain mere qadam
tere hi dar pe to ab hum salam likhte hain
sulagte shoale to hote hi hain jalane ko
jo jal chuke hain wo zaKHmi awam likhte hain
ye kaise kaison ko hum ne banaya rah-numa
halal chiz ko jo ab haram likhte hain
bahut gharib hain bhuke hain ehtijajan hum
bayaz-e-waqt pe ye subh-o-sham likhte hain
unhen KHabar nahin 'sahir' hum aaj hain aazad
jo apne aap ko ab bhi ghulam likhte hain
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
