chaman bhi tera aashiq-e-zar tha

chaman bhī tirā āshiq-e-zār thā

gul-e-surḳh ik zard ruḳhsār thā

ga.ī niiñd shevan se bulbul kī raat

kahīñ dil hamārā giraftār thā

qad-e-yār ke aage sarv-e-chaman

khaḌā duur jaise gunahgār thā

yahī jins-e-dil kī garāñ qadr thī

vale jab talak tū ḳharīdār thā

bahut ro.e ham shabnam-o-gul ko dekh

ki chaspāñ hameñ bhī kahīñ pyaar thā

mujhe ai dil-e-chāk kyā shāna sā

kisū zulf se kuchh sarokār thā

gayā 'mīr' yaañ se karoge jo yaad

kahoge ki miskīñ ajab yaar thā

chaman bhi tera aashiq-e-zar tha

gul-e-surKH ek zard ruKHsar tha

gai nind shewan se bulbul ki raat

kahin dil hamara giraftar tha

qad-e-yar ke aage sarw-e-chaman

khaDa dur jaise gunahgar tha

yahi jins-e-dil ki garan qadr thi

wale jab talak tu KHaridar tha

bahut roe hum shabnam-o-gul ko dekh

ki chaspan hamein bhi kahin pyar tha

mujhe ai dil-e-chaak kya shana sa

kisu zulf se kuchh sarokar tha

gaya 'mir' yan se karoge jo yaad

kahoge ki miskin ajab yar tha