chaman chaman na rahega jo teri bu na rahe

chaman chaman na rahegā jo terī bū na rahe

maiñ us ḳhayāl se Dartā huuñ jis meñ tū na rahe

jo terā aks bhī mujh ko nasīb ho jaa.e

mirī talāsh mukammal ho justujū na rahe

ye aarzū hai ki tujh sā tamām duniyā meñ

sivā.e mere koī aur hū-ba-hū na rahe

khuleñge dil ke darīche suhāne mausam meñ

is intizār meñ nā-kām aarzū na rahe

jo zindagī ko zarā bhī sukūn aa jaa.e

to roz-o-shab kī musalsal ye hāv-hū na rahe

ye baat mere yaqīñ ke ḳhilāf hai 'tashna'

kisī mahāz pe tū aur surḳh-rū na rahe

chaman chaman na rahega jo teri bu na rahe

main us KHayal se Darta hun jis mein tu na rahe

jo tera aks bhi mujh ko nasib ho jae

meri talash mukammal ho justuju na rahe

ye aarzu hai ki tujh sa tamam duniya mein

siwae mere koi aur hu-ba-hu na rahe

khulenge dil ke dariche suhane mausam mein

is intizar mein na-kaam aarzu na rahe

jo zindagi ko zara bhi sukun aa jae

to roz-o-shab ki musalsal ye haw-hu na rahe

ye baat mere yaqin ke KHilaf hai 'tashna'

kisi mahaz pe tu aur surKH-ru na rahe