chaman mein dekh ghunchon ko jawani apni yaad aai

chaman meñ dekh ġhunchoñ ko javānī apnī yaad aa.ī

fasāna sun ke bulbul kā kahānī apnī yaad aa.ī

jo dekhī nargis-e-bīmār gulshan meñ to bas ham ko

bahut riqqat huī aur nā-tavānī apnī yaad aa.ī

sunā kal dekhte hī aa.ine ko kyā kahūñ tum se

mujhe bas aañkh hai hai DabDabā.ī apnī yaad aa.ī

chaman meñ chahchahā bulbul kā bas jūñhī sunā ham ne

to bas yāroñ meñ ham ko sher-ḳhvānī apnī yaad aa.ī

jo dekhā hāl-e-sham.a sub.h ham ne bazm meñ jā kar

to ham ko umr-e-be-hūda gañvānī apnī yaad aa.ī

sabā ke chheḌ jo ham ne guloñ se sub.h-dam dekhī

to us gul-rū se ham ko chheḌ-ḳhvānī apnī yaad aa.ī

huā jaatā hai siine meñ jo dil ḳhuuñ hamdamo shāyad

kahīñ us shoḳh ko mehñdī rachānī apnī yaad aa.ī

hilā.ī jo sabā ne zulf-e-pur-ḳham us parī-vash ko

to vo zanjīr-e-dar ham ko hilānī apnī yaad aa.ī

na pūchho kuchh ki hañgām-e-tamāshā dekh dariyā ko

mujhe kyā kyā tabī.at kī ravānī apnī yaad aa.ī

ye tū ne 'aish' dekhī zulf-e-pechāñ kis kī jo tujh ko

pareshāñ-ḳhātirī āshufta-jānī apnī yaad aa.ī

chaman mein dekh ghunchon ko jawani apni yaad aai

fasana sun ke bulbul ka kahani apni yaad aai

jo dekhi nargis-e-bimar gulshan mein to bas hum ko

bahut riqqat hui aur na-tawani apni yaad aai

suna kal dekhte hi aaine ko kya kahun tum se

mujhe bas aankh hai hai DabDabai apni yaad aai

chaman mein chahchaha bulbul ka bas junhi suna hum ne

to bas yaron mein hum ko sher-KHwani apni yaad aai

jo dekha haal-e-shama subh hum ne bazm mein ja kar

to hum ko umr-e-be-huda ganwani apni yaad aai

saba ke chheD jo hum ne gulon se subh-dam dekhi

to us gul-ru se hum ko chheD-KHwani apni yaad aai

hua jata hai sine mein jo dil KHun hamdamo shayad

kahin us shoKH ko mehndi rachani apni yaad aai

hilai jo saba ne zulf-e-pur-KHam us pari-wash ko

to wo zanjir-e-dar hum ko hilani apni yaad aai

na puchho kuchh ki hangam-e-tamasha dekh dariya ko

mujhe kya kya tabiat ki rawani apni yaad aai

ye tu ne 'aish' dekhi zulf-e-pechan kis ki jo tujh ko

pareshan-KHatiri aashufta-jaani apni yaad aai