chaman meñ koī kalī jab bhī muskurātī hai
mujhe kisī ke tabassum kī yaad aatī hai
hamārī tīra-shabī is sahar se kyā māñge
jo dūsroñ se ujāloñ kī bhiik paatī hai
chaman meñ dekh ke phūloñ kī chāk-dāmānī
bahār apne lahū meñ nahā.e jaatī hai
gavāh haiñ ye shab-e-ġham ke Dūbte taare
kisī kī yaad meñ mushkil se niiñd aatī hai
isī bahār par itrā rahe haiñ ahl-e-chaman
na.e na.e jo gulistāñ meñ gul khilātī hai
ham aisī naav ke haiñ nāḳhudā muqaddar se
bhañvar se bach ke jo sāhil pe Duub jaatī hai
fareb dene gulistāñ ke zimma-dāroñ ko
libās-e-vaqt badal ke bahār aatī hai
sahar ko hogī ye mahfil na daur-e-jām-o-subū
'kamāl' hosh meñ aao ki raat jaatī hai
chaman mein koi kali jab bhi muskuraati hai
mujhe kisi ke tabassum ki yaad aati hai
hamari tira-shabi is sahar se kya mange
jo dusron se ujalon ki bhik pati hai
chaman mein dekh ke phulon ki chaak-damani
bahaar apne lahu mein nahae jati hai
gawah hain ye shab-e-gham ke Dubte tare
kisi ki yaad mein mushkil se nind aati hai
isi bahaar par itra rahe hain ahl-e-chaman
nae nae jo gulistan mein gul khilati hai
hum aisi naw ke hain naKHuda muqaddar se
bhanwar se bach ke jo sahil pe Dub jati hai
fareb dene gulistan ke zimma-daron ko
libas-e-waqt badal ke bahaar aati hai
sahar ko hogi ye mahfil na daur-e-jam-o-subu
'kamal' hosh mein aao ki raat jati hai
Source:
Lahja-e-Ghazal (Pg. 99)
-
Author:
Kamal Lakhnavi
-
- Publisher: Kamal Lakhnavi
- Year of Publication: 1986
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.