chamke ga abhi mere KHayalat se aage

chamke gā abhī mere ḳhayālāt se aage

vo naqsh ki thā dāġh-e-mulāqāt se aage

lagtā hai ki mushkil hai abhī din kā nikalnā

hai raat koī aur bhī is raat se aage

is vahm se vāpas nahīñ palTā huuñ ki hogā

kuchh aur bhī is ḳhvāb-e-tilismāt se aage

ārām se pīchhe vo haTā detā hai mujh ko

baḌhtā huuñ agar us kī hidāyāt se aage

daurān-e-safar kartā huuñ ārām bhī lekin

hotā huuñ Thaharne ke maqāmāt se aage

uqda isī ḳhātir koī hotā hī nahīñ hal

haiñ saare savālāt javābāt se aage

āgāh kiyā hai to hue aur bhī ġhāfil

vāqif jo nahīñ the mire hālāt se aage

ho saktā hai kyā koī bhalā un ke barābar

rahte haiñ jo ḳhud apne bayānāt se aage

itnā bhī bahut hai jo 'zafar' qahat-e-navā meñ

niklī hai koī baat mirī baat se aage

chamke ga abhi mere KHayalat se aage

wo naqsh ki tha dagh-e-mulaqat se aage

lagta hai ki mushkil hai abhi din ka nikalna

hai raat koi aur bhi is raat se aage

is wahm se wapas nahin palTa hun ki hoga

kuchh aur bhi is KHwab-e-tilismat se aage

aaram se pichhe wo haTa deta hai mujh ko

baDhta hun agar us ki hidayat se aage

dauran-e-safar karta hun aaram bhi lekin

hota hun Thaharne ke maqamat se aage

uqda isi KHatir koi hota hi nahin hal

hain sare sawalat jawabaat se aage

aagah kiya hai to hue aur bhi ghafil

waqif jo nahin the mere haalat se aage

ho sakta hai kya koi bhala un ke barabar

rahte hain jo KHud apne bayanat se aage

itna bhi bahut hai jo 'zafar' qahat-e-nawa mein

nikli hai koi baat meri baat se aage