chand diwaren kisi ko din kisi ko dar diye

chand dīvāreñ kisī ko diiñ kisī ko dar diye

ham ne ik chhoTe se ghar ke kitne TukḌe kar diye

be-adab nañgī nigāhoñ se bachāne ke liye

ham ne ma.anī ko badan alfāz ko paikar diye

kyā haqīqat kī numā.ish merī ḳhātir jurm thī

tū ne jo ā.īna dekhā us ke TukḌe kar diye

ro rahe ho der se shīshe kī kircheñ dekh kar

tum ne kyuuñ ahl-e-junūñ ke haath meñ patthar diye

dopahar ke ba.ad us ne phuul jaise haath se

shaam tak lohe kī zanjīroñ ke TukḌe kar diye

dil kī gahrā.ī meñ kyā hai mujh se ai 'saulat' na pūchh

jitne dariyā aañkh se nikle samundar kar diye

chand diwaren kisi ko din kisi ko dar diye

hum ne ek chhoTe se ghar ke kitne TukDe kar diye

be-adab nangi nigahon se bachane ke liye

hum ne mani ko badan alfaz ko paikar diye

kya haqiqat ki numaish meri KHatir jurm thi

tu ne jo aaina dekha us ke TukDe kar diye

ro rahe ho der se shishe ki kirchen dekh kar

tum ne kyun ahl-e-junun ke hath mein patthar diye

dopahar ke baad us ne phul jaise hath se

sham tak lohe ki zanjiron ke TukDe kar diye

dil ki gahrai mein kya hai mujh se ai 'saulat' na puchh

jitne dariya aankh se nikle samundar kar diye