chand lamhon ki zindagi hai abhi

chand lamhoñ kī zindagī hai abhī

in charāġhoñ meñ raushnī hai abhī

apnī ma.asūm sī tamanna ke

ḳhuun se ik ġhazal likhī hai abhī

ek muddat se hai sharīk-e-safar

zindagī phir bhī ajnabī hai abhī

ḳhushk mausam kī dil-lagī ke liye

chashm-e-gul kuchh to shabnamī hai abhī

raakh se jism meñ kahīñ na kahīñ

ek chingārī sī dabī hai abhī

apnī tahzīb ke kuchalne ko

muntazir bīsvīñ sadī hai abhī

dil kī vīrān rahguzāroñ par

koī aahaT sī aa rahī hai abhī

sab to 'irfān' luT chukā lekin

ek sarmāya-e-ḳhudī hai abhī

chand lamhon ki zindagi hai abhi

in charaghon mein raushni hai abhi

apni masum si tamanna ke

KHun se ek ghazal likhi hai abhi

ek muddat se hai sharik-e-safar

zindagi phir bhi ajnabi hai abhi

KHushk mausam ki dil-lagi ke liye

chashm-e-gul kuchh to shabnami hai abhi

rakh se jism mein kahin na kahin

ek chingari si dabi hai abhi

apni tahzib ke kuchalne ko

muntazir biswin sadi hai abhi

dil ki viran rahguzaron par

koi aahaT si aa rahi hai abhi

sab to 'irfan' luT chuka lekin

ek sarmaya-e-KHudi hai abhi