charagh-e-did jalao ki KHwab larzan hain

charāġh-e-dīd jalāo ki ḳhvāb larzāñ haiñ

dhueñ se sho.ala jagāo ki ḳhvāb larzāñ haiñ

koī ġhazal koī naġhma koī bahār kā giit

fazā-e-ġham ko sunāo ki ḳhvāb larzāñ haiñ

hayāt jabr-e-musalsal sahī magar us vaqt

rabāb-o-sāz uThāo ki ḳhvāb larzāñ haiñ

ba-nām-e-tishnagī laao koī dahaktā ayāġh

ye sard raat jalāo ki ḳhvāb larzāñ haiñ

karam kā mehr-o-mohabbat kā zikr kyā ab to

sitam ke naaz uThāo ki ḳhvāb larzāñ haiñ

ufuq pe ziist ke hañgām-e-ārzū-e-visāl

kā māhtāb sajāo ki ḳhvāb larzāñ haiñ

ye pul-sirāt-e-tamannā kī saḳht rāheñ haiñ

qadam sambhal ke uThāo ki ḳhvāb larzāñ haiñ

charagh-e-did jalao ki KHwab larzan hain

dhuen se shoala jagao ki KHwab larzan hain

koi ghazal koi naghma koi bahaar ka git

faza-e-gham ko sunao ki KHwab larzan hain

hayat jabr-e-musalsal sahi magar us waqt

rabab-o-saz uThao ki KHwab larzan hain

ba-nam-e-tishnagi lao koi dahakta ayagh

ye sard raat jalao ki KHwab larzan hain

karam ka mehr-o-mohabbat ka zikr kya ab to

sitam ke naz uThao ki KHwab larzan hain

ufuq pe zist ke hangam-e-arzu-e-visal

ka mahtab sajao ki KHwab larzan hain

ye pul-siraat-e-tamanna ki saKHt rahen hain

qadam sambhal ke uThao ki KHwab larzan hain