charagh-e-ishq jalta hai hamare qalb-e-viran mein

charāġh-e-ishq jaltā hai hamāre qalb-e-vīrāñ meñ

chale aao abhī tak raushnī hai is bayābāñ meñ

nahīñ ai dost in ashkoñ kā koī dekhne vaalā

daraḳhshāñ haiñ jo anjum kī tarah chāk-e-garebāñ meñ

kuchh aise ġham bhī hote haiñ jo ashkoñ meñ nahīñ Dhalte

sharāre ban ke lekin raqs karte haiñ rag-e-jāñ meñ

banānā thā jise mansūr use dār-o-rasan baḳhshā

use yūsuf banāte haiñ jise rakhte haiñ zindāñ meñ

vo kashtī aaj Duubā chāhtī hai paas sāhil ke

salāmat ek muddat tak rahī jo bahr-e-tūfāñ meñ

zamāne meñ faqat ek bebasī kā saath hotā hai

koī apnā nahīñ hotā kabhī hāl-e-pareshāñ meñ

charagh-e-ishq jalta hai hamare qalb-e-viran mein

chale aao abhi tak raushni hai is bayaban mein

nahin ai dost in ashkon ka koi dekhne wala

daraKHshan hain jo anjum ki tarah chaak-e-gareban mein

kuchh aise gham bhi hote hain jo ashkon mein nahin Dhalte

sharare ban ke lekin raqs karte hain rag-e-jaan mein

banana tha jise mansur use dar-o-rasan baKHsha

use yusuf banate hain jise rakhte hain zindan mein

wo kashti aaj Duba chahti hai pas sahil ke

salamat ek muddat tak rahi jo bahr-e-tufan mein

zamane mein faqat ek bebasi ka sath hota hai

koi apna nahin hota kabhi haal-e-pareshan mein