charagh-e-kushta se qindil kar raha hai mujhe

charāġh-e-kushta se qindīl kar rahā hai mujhe

vo dast-e-ġhaib jo tabdīl kar rahā hai mujhe

ye mere miTte hue lafz jo damak uThe haiñ

zarūr vo kahīñ tartīl kar rahā hai mujhe

maiñ jāgte meñ kahīñ ban rahā huuñ az-sar-e-nau

vo apne ḳhvāb meñ tashkīl kar rahā hai mujhe

harīm-e-nāz aur ik umr baad maiñ lekin

ye iḳhtisār jo tafsīl kar rahā hai mujhe

badan pe taaza nishāñ ban rahe haiñ jaise koī

mire ġhayāb meñ tahvīl kar rahā hai mujhe

badal rahe haiñ mire ḳhadd-o-ḳhāl 'turk' abhī

musalsal ā.īna tāvīl kar rahā hai mujhe

charagh-e-kushta se qindil kar raha hai mujhe

wo dast-e-ghaib jo tabdil kar raha hai mujhe

ye mere miTte hue lafz jo damak uThe hain

zarur wo kahin tartil kar raha hai mujhe

main jagte mein kahin ban raha hun az-sar-e-nau

wo apne KHwab mein tashkil kar raha hai mujhe

harim-e-naz aur ek umr baad main lekin

ye iKHtisar jo tafsil kar raha hai mujhe

badan pe taza nishan ban rahe hain jaise koi

mere ghayab mein tahwil kar raha hai mujhe

badal rahe hain mere KHadd-o-KHal 'turk' abhi

musalsal aaina tawil kar raha hai mujhe