charagh-e-shahr se sham-e-dil-e-sahra jalana

charāġh-e-shahr se sham-e-dil-e-sahrā jalānā

aur us kī lau se mahfil-e-ḳhāna-e-duniyā jalānā

tamāshe kyā dikhātā hai mirā bārūd-e-hastī

tumheñ mujh ko jalānā hai to phir zinda jalānā

baḌe sūraj bane phirte ho tum ik raat aa kar

zarā merā charāġh-e-mausam-e-sarmā jalānā

use mujh se bas itnā hī ta.alluq hai ki har raat

charāġh-e-jism apnā pesh-e-ā.īna jalānā

chalo āñkhoñ pe āñkheñ rakh ke ham ik saath roleñ

ye zid chhoḌo bahut ab ho gayā jalnā jalānā

jo har baar apnī ḳhākistar se uTh paḌtā hai zinda

to ham ne 'farhat-ehsās' ab tujhe chhoḌā jalānā

charagh-e-shahr se sham-e-dil-e-sahra jalana

aur us ki lau se mahfil-e-KHana-e-duniya jalana

tamashe kya dikhata hai mera barud-e-hasti

tumhein mujh ko jalana hai to phir zinda jalana

baDe suraj bane phirte ho tum ek raat aa kar

zara mera charagh-e-mausam-e-sarma jalana

use mujh se bas itna hi talluq hai ki har raat

charagh-e-jism apna pesh-e-aina jalana

chalo aankhon pe aankhen rakh ke hum ek sath rolen

ye zid chhoDo bahut ab ho gaya jalna jalana

jo har bar apni KHakistar se uTh paDta hai zinda

to hum ne 'farhat-ehsas' ab tujhe chhoDa jalana