charagh-e-yaad ki lau ham-safar kahan tak hai

charāġh-e-yād kī lau ham-safar kahāñ tak hai

ye raushnī mirī dahlīz par kahāñ tak hai

bas ek tum the ki jo dil kā haal jānte the

so ab tumheñ bhī hamārī ḳhabar kahāñ tak hai

musāfirān-e-junūñ gard ho ga.e lekin

khulā nahīñ ki tirī rahguzar kahāñ tak hai

har ek lamha badaltī huī kahānī meñ

hikāyat-e-ġham-e-dil mo'tabar kahāñ tak hai

zamīñ kī āḳhirī had par pahuñch ke sochtā huuñ

yahāñ se mausam-e-dīvār-o-dar kahāñ tak hai

bichhaḌne vāloñ ko andāza hī nahīñ hotā

tū ham-safar hai magar ham-safar kahāñ tak hai

ajiib log haiñ āzādiyoñ ke maare hue

qafas meñ pūchhte phirte haiñ ghar kahāñ tak hai

charagh-e-yaad ki lau ham-safar kahan tak hai

ye raushni meri dahliz par kahan tak hai

bas ek tum the ki jo dil ka haal jaante the

so ab tumhein bhi hamari KHabar kahan tak hai

musafiran-e-junun gard ho gae lekin

khula nahin ki teri rahguzar kahan tak hai

har ek lamha badalti hui kahani mein

hikayat-e-gham-e-dil mo'tabar kahan tak hai

zamin ki aaKHiri had par pahunch ke sochta hun

yahan se mausam-e-diwar-o-dar kahan tak hai

bichhaDne walon ko andaza hi nahin hota

tu ham-safar hai magar ham-safar kahan tak hai

ajib log hain aazadiyon ke mare hue

qafas mein puchhte phirte hain ghar kahan tak hai