charagh ki oT mein hai mehrab par sitara

charāġh kī oT meñ hai mehrāb par sitāra

rukā huā hai abhī gul-e-ḳhvāb par sitāra

ye kis ravānī meñ Dūbtī jā rahī haiñ āñkheñ

chamak rahā hai ye kyuuñ ruḳh-e-āb par sitāra

rukī huī hai zamīn paanī ke mintaqe par

Thahar gayā hai nigāh-e-betāb par sitāra

kahīñ mirī dhuup kī hukūmat hai aa.ine par

jhukā huā hai kahīñ zar-e-āb par sitāra

muhīt meñ ghūmte raheñge agar safīne

siyāh paḌne lagegā girdāb par sitāra

sunā thā is raat ke muqābil bhī ā.īna hai

magar dikhā.ī diyā hai mahtāb par sitāra

maiñ huuñ kisī raat kī siyāhī kā rizq lekin

talāsh kartā huuñ rū-e-ahbāb par sitāra

charagh ki oT mein hai mehrab par sitara

ruka hua hai abhi gul-e-KHwab par sitara

ye kis rawani mein Dubti ja rahi hain aankhen

chamak raha hai ye kyun ruKH-e-ab par sitara

ruki hui hai zamin pani ke mintaqe par

Thahar gaya hai nigah-e-betab par sitara

kahin meri dhup ki hukumat hai aaine par

jhuka hua hai kahin zar-e-ab par sitara

muhit mein ghumte rahenge agar safine

siyah paDne lagega girdab par sitara

suna tha is raat ke muqabil bhi aaina hai

magar dikhai diya hai mahtab par sitara

main hun kisi raat ki siyahi ka rizq lekin

talash karta hun ru-e-ahbab par sitara