chashm-e-farogh-e-dil ne dikhaya ba-faiz-e-‘aks

chashm-e-faroġh-e-dil ne dikhāyā ba-faiz-e-‘aks

ik adh-khulī nazar ko nazāra ba-faiz-e-‘aks

dil meñ junūñ ke aa.ine tartīb se lagā

jalne lagegā 'aql kā sahrā ba-faiz-e-‘aks

duniyā ba-faiz-e-kun hai in āñkhoñ ke darmiyān

dekheñge darmiyān meñ duniyā ba-faiz-e-‘aks

jalne lageñge hosh ke bikhre hue nuqūsh

dikhne lagegā ruuh kā saaya ba-faiz-e-‘aks

pahle bhī mauj-e-ḳhud-kushī meñ aa chukā hai dil

pahchāntā hai mujh ko ye dariyā ba-faiz-e-‘aks

socheñ to tīrgī bhī nahīñ raushnī se kam

dekheñ to dikh rahā hai añdherā ba-faiz-e-‘aks

chhaTtā hai rafta-rafta ġhubār-e-shab-e-firāq

hotā hai rafta-rafta saverā ba-faiz-e-‘aks

shām-e-visāl mujh se Tapaktā thā itnā nuur

dikhtā nahīñ thā aap kā chehra ba-faiz-e-‘aks

mauj-e-ziyā pe naqsh hai jo partav-e-ḳhudā

zarrāt-e-raushnī meñ nihāñ thā ba-faiz-e-‘aks

chashm-e-farogh-e-dil ne dikhaya ba-faiz-e-‘aks

ek adh-khuli nazar ko nazara ba-faiz-e-‘aks

dil mein junun ke aaine tartib se laga

jalne lagega 'aql ka sahra ba-faiz-e-‘aks

duniya ba-faiz-e-kun hai in aankhon ke darmiyan

dekhenge darmiyan mein duniya ba-faiz-e-‘aks

jalne lagenge hosh ke bikhre hue nuqush

dikhne lagega ruh ka saya ba-faiz-e-‘aks

pahle bhi mauj-e-KHud-kushi mein aa chuka hai dil

pahchanta hai mujh ko ye dariya ba-faiz-e-‘aks

sochen to tirgi bhi nahin raushni se kam

dekhen to dikh raha hai andhera ba-faiz-e-‘aks

chhaTta hai rafta-rafta ghubar-e-shab-e-firaq

hota hai rafta-rafta sawera ba-faiz-e-‘aks

sham-e-visal mujh se Tapakta tha itna nur

dikhta nahin tha aap ka chehra ba-faiz-e-‘aks

mauj-e-ziya pe naqsh hai jo partaw-e-KHuda

zarraat-e-raushni mein nihan tha ba-faiz-e-‘aks