chashm-e-ghazab jo unki karam mein badal gai

chashm-e-ġhazab jo un kī karam meñ badal ga.ī

aa.ī huī har ek balā ḳhud hī Tal ga.ī

terā karam nahīñ hai to phir aur kyā hai ye

lākhoñ kī baat kaT ke mirī baat chal ga.ī

dārū-e-chārāgar na huī kārgar magar

dīdār-e-yār hī se tabī.at sañbhal ga.ī

ummīd-e-iltifāt meñ har din guzar gayā

takmīl-e-intizār meñ har raat Dhal ga.ī

pā-bosiyoñ kī mujh ko sazā tum ne dī magar

kyā kar liyā sabā kā jo har shai masal ga.ī

tū ne buland mujh ko kiyā jab jahān meñ

duniyā hasad kī aag meñ ik laḳht jal ga.ī

'ḳhākī' vo do-ghaḌī kī ḳhushī le ke kyā kare

mauj-e-sabā kī tarah jo dil se nikal ga.ī

chashm-e-ghazab jo un ki karam mein badal gai

aai hui har ek bala KHud hi Tal gai

tera karam nahin hai to phir aur kya hai ye

lakhon ki baat kaT ke meri baat chal gai

daru-e-chaaragar na hui kargar magar

didar-e-yar hi se tabiat sanbhal gai

ummid-e-iltifat mein har din guzar gaya

takmil-e-intizar mein har raat Dhal gai

pa-bosiyon ki mujh ko saza tum ne di magar

kya kar liya saba ka jo har shai masal gai

tu ne buland mujh ko kiya jab jahan mein

duniya hasad ki aag mein ek laKHt jal gai

'KHaki' wo do-ghaDi ki KHushi le ke kya kare

mauj-e-saba ki tarah jo dil se nikal gai