chashm-e-mai-gun wahan sharab laziz

chashm-e-mai-gūñ vahāñ sharāb lazīz

dil-e-sozāñ yahāñ kabāb lazīz

lab-e-shīrīñ ke bose paa.e haiñ

ham ne dekhā hai aaj ḳhvāb lazīz

dahan-e-zaḳhm hoñTh chāTte haiñ

us kī talvār meñ hai aab lazīz

kahāñ talḳhī kahāñ ye mīThā-pan

is araq se hai kab gulāb lazīz

us ke seb-e-zaqan ke āshiq haiñ

hogā mahshar ke din hisāb lazīz

mīThī bātoñ meñ vasl kā inkār

hai na.e tarah kā javāb lazīz

kaise shāne ke daañt paḌte haiñ

hai jo vo zulf mushk-e-nāb lazīz

turshiyāñ kis maze maze kī haiñ

hai hameñ yaar kā shabāb lazīz

mar na jaa.e sanam marīz-e-hijr

sharbat-e-vasl de shitāb lazīz

ho sakegā na vasf-e-seb-e-zaqan

ai 'saḳhī' hai ye be-hisāb lazīz

chashm-e-mai-gun wahan sharab laziz

dil-e-sozan yahan kabab laziz

lab-e-shirin ke bose pae hain

hum ne dekha hai aaj KHwab laziz

dahan-e-zaKHm honTh chaTte hain

us ki talwar mein hai aab laziz

kahan talKHi kahan ye miTha-pan

is araq se hai kab gulab laziz

us ke seb-e-zaqan ke aashiq hain

hoga mahshar ke din hisab laziz

miThi baaton mein wasl ka inkar

hai nae tarah ka jawab laziz

kaise shane ke dant paDte hain

hai jo wo zulf mushk-e-nab laziz

turshiyan kis maze maze ki hain

hai hamein yar ka shabab laziz

mar na jae sanam mariz-e-hijr

sharbat-e-wasl de shitab laziz

ho sakega na wasf-e-seb-e-zaqan

ai 'saKHi' hai ye be-hisab laziz