chashm-e-nam ho to umanD aate hain dariya munh par

chashm-e-nam ho to umañD aate haiñ dariyā muñh par

khīñchiye aah to aatā hai kalejā muñh par

ḳhāl-e-ruḳhsār ko tere nahīñ dekhā jaise

sau qasam liije jo ik daana ho rakkhā muñh par

rū-e-gul-rang pe āḳhir ḳhat-e-sabz aa hī gayā

hai masal jis se Dare phir vahī aaya muñh par

ḳhvāb gūñge kā huā yaar kā shikva goyā

dil meñ phirtā hai magar lā nahīñ saktā muñh par

kal jo tum bose pe bigḌe the ki kis vaqt kahāñ

le ke muñh apnā sā rah jaate jo kahtā muñh par

ham se yuuñ kaḌvī raqīboñ se ye mīThī bāteñ

jhuuT kyā zahr hai sach baat kā kahnā muñh par

jī jalāte haiñ hasīñ kaun muñh aisoñ ke lage

koī detā nahīñ angāre ke bosā muñh par

evaz-e-bosa mazā thā jo vo gaalī detā

lāl-e-lab muñh mire lagtā to maiñ chaḌhtā muñh par

pāk-bāzoñ se hijāb aap ko be-vaj.h nahīñ

dil meñ ho sharm to hai aañkh kā pardā muñh par

sūrat-e-nai kabhī ġhībat meñ na dam māreñge

saaf jo ho.egā dil kā vo kahegā muñh par

nāma-bar ko to sunānī thī safā ġhībat meñ

ḳhat ke aane kā sunāyā hameñ fiqrā muñh par

chashm-e-nam ho to umanD aate hain dariya munh par

khinchiye aah to aata hai kaleja munh par

KHal-e-ruKHsar ko tere nahin dekha jaise

sau qasam lije jo ek dana ho rakkha munh par

ru-e-gul-rang pe aaKHir KHat-e-sabz aa hi gaya

hai masal jis se Dare phir wahi aaya munh par

KHwab gunge ka hua yar ka shikwa goya

dil mein phirta hai magar la nahin sakta munh par

kal jo tum bose pe bigDe the ki kis waqt kahan

le ke munh apna sa rah jate jo kahta munh par

hum se yun kaDwi raqibon se ye miThi baaten

jhuT kya zahr hai sach baat ka kahna munh par

ji jalate hain hasin kaun munh aison ke lage

koi deta nahin angare ke bosa munh par

ewaz-e-bosa maza tha jo wo gali deta

lal-e-lab munh mere lagta to main chaDhta munh par

pak-bazon se hijab aap ko be-wajh nahin

dil mein ho sharm to hai aankh ka parda munh par

surat-e-nai kabhi ghibat mein na dam marenge

saf jo hoega dil ka wo kahega munh par

nama-bar ko to sunani thi safa ghibat mein

KHat ke aane ka sunaya hamein fiqra munh par