chashm-e-nam se dekhta hai kyon meri chashm-e-pur-ab

chashm-e-nam se dekhtā hai kyoñ mirī chashm-e-pur-āb

tere dil kī barf ne dekhā nahīñ hai āftāb

yuuñ guzartī jā rahī hai zindagī kī dopahar

dil meñ ik ummīd-e-kāzib aur āñkhoñ meñ sarāb

ḳhud-sarī us tund-ḳhū kī jaate jaate jā.egī

ek hī din meñ kabhī aatā nahīñ hai inqalāb

tum ne ham ko kyā diyā aur ham se tum ko kyā milā

mil ga.ī fursat kabhī to ye bhī kar leñge hisāb

ham ko apnā shahr yaad aatā na shāyad is qadar

kyā kareñ rahtā hai tere shahr kā mausam ḳharāb

ek ḳhat likh kar samajhnā farz puurā ho gayā

vaah 'bāsir' jī tumhārā bhī nahīñ koī javāb

chashm-e-nam se dekhta hai kyon meri chashm-e-pur-ab

tere dil ki barf ne dekha nahin hai aaftab

yun guzarti ja rahi hai zindagi ki dopahar

dil mein ek ummid-e-kazib aur aankhon mein sarab

KHud-sari us tund-KHu ki jate jate jaegi

ek hi din mein kabhi aata nahin hai inqalab

tum ne hum ko kya diya aur hum se tum ko kya mila

mil gai fursat kabhi to ye bhi kar lenge hisab

hum ko apna shahr yaad aata na shayad is qadar

kya karen rahta hai tere shahr ka mausam KHarab

ek KHat likh kar samajhna farz pura ho gaya

wah 'basir' ji tumhaara bhi nahin koi jawab