chashm-e-saqi ka jo ima ho gaya

chashm-e-sāqī kā jo iimā ho gayā

riñd-e-mai-kash shaiḳh san.ā ho gayā

mar gayā maiñ ab to haT puurī huī

lo mirī jaañ ab to kahnā ho gayā

har girāñ jaañ ko hī shauq-e-jins-e-dard

kis qadar sastā ye saudā ho gayā

āfat-e-jāñ terī qahr-ālūda chashm

rāhat-e-jāñ terā hañsnā ho gayā

kuchh na dekhī ham ne tāsīr-e-fuġhāñ

rote rote ik zamāna ho gayā

aa ga.ī jab yaad us bedard kī

dard sā ik dil meñ paidā ho gayā

aamad aamad se mire saffāk kī

hashr meñ ik hashr barpā ho gayā

dil uḌā kar le ga.ī us kī nazar

vo parī-rū muft rusvā ho gayā

dekh kar ā.īna vo but ban ga.e

mujh se baḌh kar un ko sakta ho gayā

'hasrat'-e-dīvāna dil de kar unheñ

ik zamāne kā tamāshā ho gayā

chashm-e-saqi ka jo ima ho gaya

rind-e-mai-kash shaiKH sana ho gaya

mar gaya main ab to haT puri hui

lo meri jaan ab to kahna ho gaya

har giran jaan ko hi shauq-e-jins-e-dard

kis qadar sasta ye sauda ho gaya

aafat-e-jaan teri qahr-aluda chashm

rahat-e-jaan tera hansna ho gaya

kuchh na dekhi hum ne tasir-e-fughan

rote rote ek zamana ho gaya

aa gai jab yaad us bedard ki

dard sa ek dil mein paida ho gaya

aamad aamad se mere saffak ki

hashr mein ek hashr barpa ho gaya

dil uDa kar le gai us ki nazar

wo pari-ru muft ruswa ho gaya

dekh kar aaina wo but ban gae

mujh se baDh kar un ko sakta ho gaya

'hasrat'-e-diwana dil de kar unhen

ek zamane ka tamasha ho gaya