chashm-e-sāqī kā tasavvur bazm meñ kaam aa gayā
bhar ga.ī shīshoñ meñ mai gardish meñ ḳhud jaam aa gayā
muztarib dil ik tajallī meñ faqat kaam aa gayā
ibtidā hī meñ ḳhayāl-e-ibrat-anjām aa gayā
husn ḳhud-ārā na yuuñ hotā hijāb-andar-hijāb
shān-e-tamkīñ ko ḳhayāl-e-manzar-e-ām aa gayā
husn ne itnā taġhāful merī hastī se kiyā
rafta rafta zindagī kā mujh pe ilzām aa gayā
intizār ab shaaq hai ai sāqī-e-paimāñ-shikan
ghir ga.e bādal surāhī aa ga.ī jaam aa gayā
ham to samjhe the sukūñ pā.eñge be-hoshī ke ba.ad
hosh jab aayā to phir lab par tirā naam aa gayā
ḳhaak āḳhir ho gayā sab sāz-o-sāman-e-hayāt
kyuuñ dil-e-barbād-e-hasrat ab to ārām aa gayā
ho ga.ī āsūdgī jhagḌā chukā rāhat milī
nā-tavāñ thā dil nabard-e-ishq meñ kaam aa gayā
dil ne kī piirī meñ paidā ġhaflat-e-ahd-e-shabāb
sub.h kā bhūlā jo manzil par sar-e-shām aa gayā
parda-e-duniyā meñ ab be-sūd haiñ ye koshisheñ
ai farem-e-āb-o-dāna maiñ tah-e-dām aa gayā
riñd mustaġhnī haiñ duniyā se ġharaz ham ko 'azīz'
daulat-e-jam mil ga.ī jab haath meñ jaam aa gayā
chashm-e-saqi ka tasawwur bazm mein kaam aa gaya
bhar gai shishon mein mai gardish mein KHud jam aa gaya
muztarib dil ek tajalli mein faqat kaam aa gaya
ibtida hi mein KHayal-e-ibrat-anjam aa gaya
husn KHud-ara na yun hota hijab-andar-hijab
shan-e-tamkin ko KHayal-e-manzar-e-am aa gaya
husn ne itna taghaful meri hasti se kiya
rafta rafta zindagi ka mujh pe ilzam aa gaya
intizar ab shaq hai ai saqi-e-paiman-shikan
ghir gae baadal surahi aa gai jam aa gaya
hum to samjhe the sukun paenge be-hoshi ke baad
hosh jab aaya to phir lab par tera nam aa gaya
KHak aaKHir ho gaya sab saz-o-saman-e-hayat
kyun dil-e-barbaad-e-hasrat ab to aaram aa gaya
ho gai aasudgi jhagDa chuka rahat mili
na-tawan tha dil nabard-e-ishq mein kaam aa gaya
dil ne ki piri mein paida ghaflat-e-ahd-e-shabab
subh ka bhula jo manzil par sar-e-sham aa gaya
parda-e-duniya mein ab be-sud hain ye koshishen
ai farem-e-ab-o-dana main tah-e-dam aa gaya
rind mustaghni hain duniya se gharaz hum ko 'aziz'
daulat-e-jam mil gai jab hath mein jam aa gaya
Source:
Anjum Kada (Pg. 108)
-
Author:
Mirza Mohammad Hadi Aziz Lakhnavi
-
- Edition: 1956
- Publisher: Anjuman Taraqqi Urdu (Hind), Aligarh
- Year of Publication: 1956
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.