chashm-e-shab-zad se kaise ye hawale nikle

chashm-e-shab-zād se kaise ye havāle nikle

kin añdheroñ ke ta'āqub meñ ujāle nikle

dam-ba-dam mauj-e-havādis ne hameñ gher liyā

ham bhī kashtī ko salīqe se sañbhāle nikle

ham bhalā apne raqīboñ kā gila kyā karte

sab ke sab aap ke hī chāhne vaale nikle

gher laa.ī thī jinheñ sail-e-junūñ kī hasrat

ek sāhil pe sabhī Dūbne vaale nikle

kitnā rangīn fasāna thā kisī nisbat kā

jis ke aurāq sabhī surḳhiyoñ vaale nikle

ka.ī 'unvān the tahrīr-e-tamanna ke asiir

jin pe ashkoñ meñ maqāloñ pe maqāle nikle

jo uḌī misr ke bāzār ke sajne kī ḳhabar

ham bhī is dil kī kamā.ī ko khañgāle nikle

kis kī mohtāt-nigāhī kā asar hai 'maḳhfī'

apnī tasvīr se lipTe hue jaale nikle

chashm-e-shab-zad se kaise ye hawale nikle

kin andheron ke ta'aqub mein ujale nikle

dam-ba-dam mauj-e-hawadis ne hamein gher liya

hum bhi kashti ko saliqe se sanbhaale nikle

hum bhala apne raqibon ka gila kya karte

sab ke sab aap ke hi chahne wale nikle

gher lai thi jinhen sail-e-junun ki hasrat

ek sahil pe sabhi Dubne wale nikle

kitna rangin fasana tha kisi nisbat ka

jis ke auraq sabhi surKHiyon wale nikle

kai 'unwan the tahrir-e-tamanna ke asir

jin pe ashkon mein maqalon pe maqale nikle

jo uDi misr ke bazar ke sajne ki KHabar

hum bhi is dil ki kamai ko khangale nikle

kis ki mohtat-nigahi ka asar hai 'maKHfi'

apni taswir se lipTe hue jale nikle