chashm-e-yaqin se dekhiye jalwa-gah-e-sifat mein

chashm-e-yaqīñ se dekhiye jalva-gah-e-sifāt meñ

husn hī husn hai tamām ishq kī kā.enāt meñ

aise bhī vaqt aa.e haiñ ishq kī vārdāt meñ

mastiyāñ jhuum jhuum uThīñ dīda-e-kā.ināt meñ

tū mirī sarguzisht-e-ġham sun ke karegā kyā nadīm

vaqf-e-ḳhalish hai har-nafas dard hai baat baat meñ

jām-o-sharāb-o-ḳhum subū sāqiyā haiñ barā.e-nām

nashsha tirī nazar kā hai mai-kada-e-hayāt meñ

jis kā aniis terā ġham jis kī rafīq terī yaad

us ko milā sukūn-e-dil bazm-e-taġhayyurāt meñ

tark-o-talab ke marhale is tarah ham ne tai kiye

sāmne mere vo rahe ā.īna-e-hayāt meñ

ālam-e-be-ḳhudī meñ gar sajda kiyā koī 'vaqār'

ban gayā naqsh-e-jāvedāñ manzil-e-be-sabāt meñ

chashm-e-yaqin se dekhiye jalwa-gah-e-sifat mein

husn hi husn hai tamam ishq ki kaenat mein

aise bhi waqt aae hain ishq ki wardat mein

mastiyan jhum jhum uThin dida-e-kainat mein

tu meri sarguzisht-e-gham sun ke karega kya nadim

waqf-e-KHalish hai har-nafas dard hai baat baat mein

jam-o-sharab-o-KHum subu saqiya hain barae-nam

nashsha teri nazar ka hai mai-kada-e-hayat mein

jis ka anis tera gham jis ki rafiq teri yaad

us ko mila sukun-e-dil bazm-e-taghayyuraat mein

tark-o-talab ke marhale is tarah hum ne tai kiye

samne mere wo rahe aaina-e-hayat mein

aalam-e-be-KHudi mein gar sajda kiya koi 'waqar'

ban gaya naqsh-e-jawedan manzil-e-be-sabaat mein