chashm tar hoti hai jab zikr tera hota hai

chashm tar hotī hai jab zikr tirā hotā hai

huuk uThtī hai to kuchh dard sivā hotā hai

qatra dariyā se judā ho ke havā hotā hai

hijr kī taab na laayā vo fanā hotā hai

raas aaya na kabhī ham ko tabīboñ kā ilaaj

jitnī piitā huuñ davā dard sivā hotā hai

jab hai āġhāz-e-mohabbat meñ hī aisī hālat

haal ab dekhiye anjām meñ kyā hotā hai

terī bhī chaal se uThte haiñ hazāroñ fitne

mere nāloñ se agar hashr bapā hotā hai

bebasī par mujhe ronā bhī nadāmat bhī hai

kis bure vaqt meñ zālim tū judā hotā hai

be-vafāoñ kī nazar kuchh merī taqdīr nahīñ

vo nazar pher leñ sau martaba kyā hotā hai

maanā yaktā-e-zamāna ho magar kyoñ sāhib

husn hone se bhalā goī ḳhudā hotā hai

kyoñ ḳhafā ho ga.e ik zikr-e-sitam hī to thā

dostoñ hī meñ to ai jaan gila hotā hai

aisī ThanDī havā barsāt kī rut dekh zarā

aisī hālat meñ kahāñ koī judā hotā hai

raaz kyā hai jo unheñ aaj mohabbat uTThī

hai to kuchh baat jo ye uzr-e-jafā hotā hai

hashr meñ vāda-e-dīdār to kuchh Thiik nahīñ

aaj dikhlāne meñ sūrat unheñ kyā hotā hai

rind-e-mai-nosh hai 'dīvān' ḳhudā kā banda

mat burā kah use kyoñ muft burā hotā hai

chashm tar hoti hai jab zikr tera hota hai

huk uThti hai to kuchh dard siwa hota hai

qatra dariya se juda ho ke hawa hota hai

hijr ki tab na laya wo fana hota hai

ras aaya na kabhi hum ko tabibon ka ilaj

jitni pita hun dawa dard siwa hota hai

jab hai aaghaz-e-mohabbat mein hi aisi haalat

haal ab dekhiye anjam mein kya hota hai

teri bhi chaal se uThte hain hazaron fitne

mere nalon se agar hashr bapa hota hai

bebasi par mujhe rona bhi nadamat bhi hai

kis bure waqt mein zalim tu juda hota hai

be-wafaon ki nazar kuchh meri taqdir nahin

wo nazar pher len sau martaba kya hota hai

mana yakta-e-zamana ho magar kyon sahib

husn hone se bhala goi KHuda hota hai

kyon KHafa ho gae ek zikr-e-sitam hi to tha

doston hi mein to ai jaan gila hota hai

aisi ThanDi hawa barsat ki rut dekh zara

aisi haalat mein kahan koi juda hota hai

raaz kya hai jo unhen aaj mohabbat uTThi

hai to kuchh baat jo ye uzr-e-jafa hota hai

hashr mein wada-e-didar to kuchh Thik nahin

aaj dikhlane mein surat unhen kya hota hai

rind-e-mai-nosh hai 'diwan' KHuda ka banda

mat bura kah use kyon muft bura hota hai