chehra rakhte hain hum phir bhi KHush hain bahut toD kar aaine

chehra rakhte haiñ ham phir bhī ḳhush haiñ bahut toḌ kar aa.ine

'aks kī mā’naviyyat samajhte bhī kyā kam-hunar aa.ine

jā ke kis duur ke des meñ jā base jo adā-fahm the

ham ne patthar ḳharīde tire shahr meñ bech kar aa.ine

ḳhāl-o-ḳhat ke varaq lamha-e-rafta kab kā churā le gayā

kyā chhupāte haiñ ab merī be-chehragī kī ḳhabar aa.ine

us kī āvārgī ko du'ā.eñ do ai sāhibān-e-junūñ

jis ke naqsh-e-qadam ne bichhā.e sar-e-rahguzar aa.ine

thiiñ jo mā'nī kī mānūs sī sūrateñ vo kahāñ kho ga.iiñ

dhund meñ lipTe lipTe haiñ alfāz ke mo'tabar aa.ine

kaise āshob-e-dānish pe rakhtā nazar maiñ kam-āgāh thā

de gayā mujh ko āñkhoñ ke badle koī be-basar aa.ine

apnī āvāz ko naqsh meñ Dhālne kā hunar siikh lo

tum se milne ko bhaTke haiñ kyā kyā 'fazā' dar-ba-dar aa.ine

chehra rakhte hain hum phir bhi KHush hain bahut toD kar aaine

'aks ki ma’nawiyyat samajhte bhi kya kam-hunar aaine

ja ke kis dur ke des mein ja base jo ada-fahm the

hum ne patthar KHaride tere shahr mein bech kar aaine

KHal-o-KHat ke waraq lamha-e-rafta kab ka chura le gaya

kya chhupate hain ab meri be-chehragi ki KHabar aaine

us ki aawargi ko du'aen do ai sahiban-e-junun

jis ke naqsh-e-qadam ne bichhae sar-e-rahguzar aaine

thin jo ma'ni ki manus si suraten wo kahan kho gain

dhund mein lipTe lipTe hain alfaz ke mo'tabar aaine

kaise aashob-e-danish pe rakhta nazar main kam-agah tha

de gaya mujh ko aankhon ke badle koi be-basar aaine

apni aawaz ko naqsh mein Dhaalne ka hunar sikh lo

tum se milne ko bhaTke hain kya kya 'faza' dar-ba-dar aaine