chehre pe kisi karb ki tanwir nahin ki

chehre pe kisī karb kī tanvīr nahīñ kī

mahsūs hī karte rahe tafsīr nahīñ kī

qadmoñ ko haqīqat kī zamīñ par hī dharā hai

ḳhush-fahmī kī jannat kabhī ta.amīr nahīñ kī

vaa.iz ke kabhī naqsh-e-qadam par na chale ham

ḳhud kar ke dikhāyā kabhī taqrīr nahīñ kī

ma.asūm charāġhoñ ko havāoñ ne bujhāyā

kyoñ bhaḌke hue sho.aloñ pe tāzīr nahīñ kī

us kī hī kahī baat ko duniyā ne navāzā

jis ne kabhī iz.hār meñ tāḳhīr nahīñ kī

kis tarah zamāne ko ḳhabar ho ga.ī is kī

vo baat jo ash.ār meñ tahrīr nahīñ kī

kuchh ḳhvāb jo me.arāj the hastī ke 'tabassum'

un ḳhvāboñ kī mailī kabhī ta.abīr nahīñ kī

chehre pe kisi karb ki tanwir nahin ki

mahsus hi karte rahe tafsir nahin ki

qadmon ko haqiqat ki zamin par hi dhara hai

KHush-fahmi ki jannat kabhi tamir nahin ki

waiz ke kabhi naqsh-e-qadam par na chale hum

KHud kar ke dikhaya kabhi taqrir nahin ki

masum charaghon ko hawaon ne bujhaya

kyon bhaDke hue shoalon pe tazir nahin ki

us ki hi kahi baat ko duniya ne nawaza

jis ne kabhi izhaar mein taKHir nahin ki

kis tarah zamane ko KHabar ho gai is ki

wo baat jo ashaar mein tahrir nahin ki

kuchh KHwab jo mearaj the hasti ke 'tabassum'

un KHwabon ki maili kabhi tabir nahin ki