chehre pe nur-e-subh siyah gesuon mein raat

chehre pe nūr-e-sub.h siyah gesuoñ meñ raat

utrī thī ik parī liye apne paroñ meñ raat

din to shikam kī aag bujhāne meñ jaa.e hai

shukr-e-ḳhudā ki kaTtī hai dānishvaroñ meñ raat

thī vaj.h-e-ḳhvāb kal yahī taskīn-e-qalb bhī

ham ko to ab Darāne lagī zalzaloñ meñ raat

har sāhab-e-kamāl hai fan ke uruuj par

qibla-numā rahī hai sabhī hādsoñ meñ raat

āñkhoñ meñ un kā husn thā sotā maiñ kis tarah

aa.ī thī garche ghar mire kitne dinoñ meñ raat

āvārgī kī chhāp vo aa.ī thī chhoḌne

sharminda ho ke lauT ga.ī dil-jaloñ meñ raat

kuchh der hāv-hū kā thā manzar shabāb par

din kī thakī thī so hī ga.ī mandiroñ meñ raat

ham the ki ġharq-e-jām rahe mai-kashoñ ke biich

ham ko talāsh kartī rahī ābidoñ meñ raat

jugnū chamak rahe the ujāle meñ ishq ke

'dā.em' qayām kartī kahāñ buz-diloñ meñ raat

chehre pe nur-e-subh siyah gesuon mein raat

utri thi ek pari liye apne paron mein raat

din to shikam ki aag bujhane mein jae hai

shukr-e-KHuda ki kaTti hai danishwaron mein raat

thi wajh-e-KHwab kal yahi taskin-e-qalb bhi

hum ko to ab Darane lagi zalzalon mein raat

har sahab-e-kamal hai fan ke uruj par

qibla-numa rahi hai sabhi hadson mein raat

aankhon mein un ka husn tha sota main kis tarah

aai thi garche ghar mere kitne dinon mein raat

aawargi ki chhap wo aai thi chhoDne

sharminda ho ke lauT gai dil-jalon mein raat

kuchh der haw-hu ka tha manzar shabab par

din ki thaki thi so hi gai mandiron mein raat

hum the ki gharq-e-jam rahe mai-kashon ke bich

hum ko talash karti rahi aabidon mein raat

jugnu chamak rahe the ujale mein ishq ke

'daem' qayam karti kahan buz-dilon mein raat