chhati jala kare hai soz-e-darun bala hai

chhātī jalā kare hai soz-e-darūñ balā hai

ik aag sī rahe hai kyā jāniye ki kyā hai

maiñ aur tū haiñ donoñ majbūr-e-taur apne

pesha tirā jafā hai sheva mirā vafā hai

rū-e-suḳhan hai kīdhar ahl-e-jahāñ kā yā rab

sab muttafiq haiñ is par har ek kā ḳhudā hai

kuchh be-sabab nahīñ hai ḳhātir mirī pareshāñ

dil kā alam judā hai ġham jaan kā judā hai

husn un bhī moīnoñ kā thā aap hī sūratoñ meñ

is martabe se aage koī chale to kyā hai

shādī se ġham-e-jahāñ meñ vo chand ham ne paayā

hai iid ek din to das roz yaañ dahā hai

hai ḳhasam-jān-e-āshiq vo mahv-e-nāz lekin

har lamha be-adā.ī ye bhī to ik adā hai

ho jaa.e yaas jis meñ so āshiqī hai varna

har ranj ko shifā hai har dard ko davā hai

nāyāb us guhar kī kyā hai talāsh āsāñ

jī Dūbtā hai us kā jo tah se āshnā hai

mushfiq malāz o qibla kaaba ḳhudā payambar

jis ḳhat meñ shauq se maiñ kyā kyā use likhā hai

tāsīr-e-ishq dekho vo naama vaañ pahuñch kar

juuñ kāġhaz-e-havā.ī har sū uḌā phirā hai

hai garche tifl-e-maktab vo shoḳh abhī to lekin

jis se milā hai us kā ustād ho milā hai

phirte ho 'mīr' sāhab sab se jude jude tum

shāyad kahīñ tumhārā dil in dinoñ lagā hai

chhati jala kare hai soz-e-darun bala hai

ek aag si rahe hai kya jaaniye ki kya hai

main aur tu hain donon majbur-e-taur apne

pesha tera jafa hai shewa mera wafa hai

ru-e-suKHan hai kidhar ahl-e-jahan ka ya rab

sab muttafiq hain is par har ek ka KHuda hai

kuchh be-sabab nahin hai KHatir meri pareshan

dil ka alam juda hai gham jaan ka juda hai

husn un bhi moinon ka tha aap hi suraton mein

is martabe se aage koi chale to kya hai

shadi se gham-e-jahan mein wo chand hum ne paya

hai id ek din to das roz yan daha hai

hai KHasam-jaan-e-ashiq wo mahw-e-naz lekin

har lamha be-adai ye bhi to ek ada hai

ho jae yas jis mein so aashiqi hai warna

har ranj ko shifa hai har dard ko dawa hai

nayab us guhar ki kya hai talash aasan

ji Dubta hai us ka jo tah se aashna hai

mushfiq malaz o qibla kaba KHuda payambar

jis KHat mein shauq se main kya kya use likha hai

tasir-e-ishq dekho wo nama wan pahunch kar

jun kaghaz-e-hawai har su uDa phira hai

hai garche tifl-e-maktab wo shoKH abhi to lekin

jis se mila hai us ka ustad ho mila hai

phirte ho 'mir' sahab sab se jude jude tum

shayad kahin tumhaara dil in dinon laga hai