chhat na hum par koi giri sahab

chhat na ham par koī girī sāhab

koī ne.amat hai be-gharī sāhab

dekhne ko kahīñ nahīñ hai kuchh

āñkhoñ par gard jam ga.ī sāhab

kabhī afsar bhī banñā paḌtā hai

ek ye bhī hai naukrī sāhab

ghup añdhere meñ bhī chalī aa.ī

raushnī raushnī rahī sāhab

is meñ dīvār kī ḳhatā kyā hai

girne vaalī thī gir ga.ī sāhab

vaqt se aage jā rahā thā maiñ

maiñ ne dekhī nahīñ ghaḌī sāhab

ek arsa paḌī rahī be-kār

thī jo ik chiiz kaam kī sāhab

ġhaur se dekhtā huuñ aadmī ko

muTThī bhar ḳhaak rah ga.ī sāhab

nazar aa.ī hazār chehroñ meñ

koī sūrat thī vājibī sāhab

chhat na hum par koi giri sahab

koi neamat hai be-ghari sahab

dekhne ko kahin nahin hai kuchh

aankhon par gard jam gai sahab

kabhi afsar bhi banna paDta hai

ek ye bhi hai naukri sahab

ghup andhere mein bhi chali aai

raushni raushni rahi sahab

is mein diwar ki KHata kya hai

girne wali thi gir gai sahab

waqt se aage ja raha tha main

main ne dekhi nahin ghaDi sahab

ek arsa paDi rahi be-kar

thi jo ek chiz kaam ki sahab

ghaur se dekhta hun aadmi ko

muTThi bhar KHak rah gai sahab

nazar aai hazar chehron mein

koi surat thi wajibi sahab