chhaTi hai rah se gard-e-malal mere liye

chhaTī hai raah se gard-e-malāl mere liye

ki jhūmtī hai havā Daal Daal mere liye

huā hai kyā karūñ jiinā muhāl mere liye

mire hī shahr se mujh ko nikāl mere liye

koī bhī kaam nahīñ ho sakā hai fursat meñ

ki kam paḌe haiñ bahut māh-o-sāl mere liye

vo kaun hai jo mirī aartī utāregā

sajā ke rakkhā hai kis ne ye thaal mere liye

maiñ phūñk phūñk ke chaltā huuñ raah meñ us kī

qadam qadam pe bichhā.e haiñ jaal mere liye

kahīñ pe ho ga.e pazhmurda phuul āñgan meñ

huā hai sabza kahīñ pā.emāl mere liye

khulā ye raaz rihā.ī ke ba.ad hī mujh par

banāyā us ne mujhe yarġhamāl mere liye

mirā dimāġh hai mā.ūf dil udaas bahut

huā hai jism bhī merā niDhāl mere liye

hue haiñ rāste masdūd kyuuñ mire 'hamdam'

junūb mere liye thā shumāl mere liye

chhaTi hai rah se gard-e-malal mere liye

ki jhumti hai hawa Dal Dal mere liye

hua hai kya karun jina muhaal mere liye

mere hi shahr se mujh ko nikal mere liye

koi bhi kaam nahin ho saka hai fursat mein

ki kam paDe hain bahut mah-o-sal mere liye

wo kaun hai jo meri aarti utarega

saja ke rakkha hai kis ne ye thaal mere liye

main phunk phunk ke chalta hun rah mein us ki

qadam qadam pe bichhae hain jal mere liye

kahin pe ho gae pazhmurda phul aangan mein

hua hai sabza kahin paemal mere liye

khula ye raaz rihai ke baad hi mujh par

banaya us ne mujhe yarghamal mere liye

mera dimagh hai mauf dil udas bahut

hua hai jism bhi mera niDhaal mere liye

hue hain raste masdud kyun mere 'hamdam'

junub mere liye tha shumal mere liye